有心理準備先好睇
所謂小巴鬼故,聽就聽得多,今次發生o係自己身上,諗番老毛骨悚然
禽晚,我同條女去完夜街,就送佢番屋企,當時已經係半夜3點幾
有架小巴到左,我同條囡上左車,當時,我好記得,唔計司機,車上總共有3個乘客,係一對情侶,加一個阿伯
佢地坐晒前排,而我同條女,就坐佢地後面一排,咁即係話,我地後面幾排係冇人坐
個司機同其餘3個乘客,就係住我地前面,一眼睇晒
咁架車係幾多號我就唔講啦,廢事比人起底
可以講既係,架車係途中係會經過一大段好靜既小路,
平常來講,呢段路係冇乜中途客上落車,禽晚,就發生一件好奇怪既事
架車開到半途,突然間,佢駛埋一邊停車
當時,我地仲以為係唔係架車有事,司機要check呢?點解我地第一個直覺會係咁諗?因為,我地見唔到路上有人截車,亦冇人嗌落車
但係,我地見到個司機完全冇落車既意欲,佢仲打開左乘客度門
我地都好奇怪,莫非司機要等客?唔係嘛,半夜三更條路又冇人,邊度會有客呢?
路上跟本一個人都冇
呢個時候,我地見到個司機,望住左邊窗外,講左一句
"喂,你係唔係要上車o架!"
當時,我地寒一寒,心諗,個司機同邊個講野呀??
之後,個司機就柵門,繼續開車
我同條女你眼望我眼咁,大家都係諗緊同樣一件事,究竟...個司機做乜??
莫非..真係見到一D我地見唔到既野??
我條女一向都八八卦卦既,佢就話"希望...o個D野冇上車啦...."
因為..我地真係見唔到有任何野上左車..
如果真係有野上左車,咁佢坐o左o係邊...我地前面仍然係3個乘客,佢地三個都好似若無其事咁...
我地開始好驚..究竟o個樣野有冇上車..佢又坐左o係邊...
我地只係希望盡快到目的地
呢個時候,我隱隱若若聽到D聲...起初聽得唔好係好清楚,但係....愈來愈大聲
係好似聽到粵劇既音樂聲..但係....係一種,好慢,好懮怨既旋律..而且仲係冇人唱既聲,由我地身後傳過來
o係呢咁既環境之下,聽到咁既聲,我個心跳得好快,我心諗,唔係咁邪嘛
我望一望我條囡,佢點一點頭,佢知我想問乜
"你都聽到呀?" 我問佢
"係呀...."
"唔係咁撚恐怖嘛...."
"可能...係人地手機聆聲呢"
"邊撚個會用D咁恐怖既聲呀"
"乜野人都有既...."
"就算有...後面都冇人坐!!"
"可能之前有人跌左電話係後面.."
"咁點算呀?"
"你去執番佢啦!"
"痴線!!我死都唔另轉面望呀!!"
"咁呀,等其他人去執啦"
呢D恐怖既音樂,愈來愈大聲,但係,坐前排既人,完全冇反應,佢地好似聽唔到一樣!!!!
我地見到,個司機同其他乘客都好似冇反應
我地就愈諗愈寒..我地成個人硬晒,唔敢四維望,希望到D到目的地
突然之間,D聲停左...
前面o個一對情侶嗌落車
個司機就停埋一邊比佢地
當佢地企起身,轉身準備落車時
我第一次見到呢對情侶個樣,
佢地兩個木無表情,好似對剛才發生既事全無知覺咁
當佢地行落車門,呢個時候,個男既另轉頭望我地一望,係我第一次同佢面對面咁望
我呢世都唔會忘記,佢地既表情,由一個呆若木雞既樣,剎那間,變得極為驚訝!!
佢地好似突然之間睇到一D好恐怖既野,睜大開雙眼,想開口大叫卻叫唔出聲,塊面白晒
個男既仲企唔隠,向後跌一跌,佢條囡即刻扶住佢,但係佢條囡既表情亦都係一樣
極度驚訝!
佢倆個即刻跳落車,一邊大嗌一邊跑住走左去
個司機柵番度門,繼續開車,剛才發生既事,就好似只有我地兩個人留意到
架車上面,剩番司機,一個阿伯,同我地兩個
我條囡即刻攬實我對手,細細聲咁問我
"究竟頭先佢地兩個睇到乜野呀??"
"我點Q知喎...."
"佢係唔係坐左o係我地後面呀...."
"唔好望呀!!!"
"咁點算呀..."
"頭先D怪聲停左...可能...o個D野已經落左車啦...."
"我好驚呀...."
"唔好驚..就快到..."
個司機繼續開車...我地就繼續驚,希望,唔好再發生咩怪事,順順利利....
呢個時候,有叮叮聲
係落車鐘既聲...但係,我地當然冇按過,而坐我地前面個阿伯,都冇按
咁究竟係邊個按
叮叮聲愈來愈密,但係當時架小巴係行緊一邊好偏僻既小路,附近冇民居,日頭都唔會有人o係呢段路落車
何況夜晚?
D叮叮聲已經密到差唔多係比人狂按咁
個司機一邊渣車一邊大嗌"係唔係有人落車呀"
唔洗講都知...冇人會答...
個司機問多幾次,我就想提一提醒個司機,架車上面好似多左一D野....
"司機大佬...冇人接鐘...."
"哦,係咩個鐘一定又係壞左啦"
似乎個司機完全get唔到我既意思
呢個時候,叮叮聲就停左啦
架車繼續行
而我地知道,架車上面,除左司機,阿伯,我地兩個之外
仲多左D野...
我條囡攬得我好實,佢坐埋邊,而我坐外邊
我條囡個頭就伏o係我膊頭上面,乜都唔敢望,
我o係窗既玻璃上,見到我條囡個倒影
通常呢D小巴鬼故,主角望出窗,都會見到一D唔應該見到既野
好慶幸我見唔到..
架車keep住去,我攬緊D我條囡,
我望住o係窗既玻璃,我條囡伏底頭既倒影,我先留意到佢D頭髮好長,長到落背脊
"喂,你要剪頭髮啦" 我同比我攬住既女朋友講,希望轉移話題等佢放心D
"咩呀,上星期先剪完" 佢坐番起身望一望我
"仲話唔長,你自已睇唔到長到蓋住背脊咩?"
"邊有喎" 佢撥一撥頭髮
呢個時候,我先發現,佢頭髮跟本唔係咁長...我已經知道..我見到o個D野啦..
因為..窗既玻璃上個女人倒影,完全冇任何移動過,而我條囡,已經一早轉身望住我
個倒影..唔係我條女既倒影
我條囡已經get到我有D野
"你見到咩呀??"
"冇....野呀...."
佢冇再問,只係再攬實D我.
一直坐前面既阿伯,都好似若無其事咁,呢個時候
佢仍然坐o係度,望都冇望過我地一眼,細細聲咁,講左一句
"唔好問,唔好望,落車"
跟住阿伯向司機講要落車
我地一早已經淆到死,諗都唔諗,就決定一齊落
我地落車時,dup低頭,乜都唔敢望..之後,阿伯落車前,同司機講左一句"你兜一轉差館啦,注心渣車"
我地見到,個司機聽到呢句之後,成身震左一震,等我地3個落晒車之後,佢極速柵門跟住開走左
我地終於可以安靜下來,呢個時候,我同條囡問個阿伯發生咩事
佢話其實一早感覺得到有野上左車
之不過沿途更辟靜,落車更危險,所以佢唔落車
佢話,千其唔好比o個D野知,你見到佢地察覺到佢地存在,否則,佢地就會跟住你
佢話,今次呢隻野好惡,頭先隻野就坐我地隔離,仲差D比我見到
我聽完之後嚇到同條囡跑番屋企,仲過埋夜,成晚都唔敢再出街
好驚再見到o個D野
source:
http://forum5.hkgolden.com/view.aspx?type=BW&message=3190968
沒有留言:
張貼留言