| 9月 23日 星期五 12:20 更新 |
【iMoney智富雜誌—保你大】
經過我一輪講解，茶餐廳老闆娘芳姐的姨甥仔阿東，基本上已經認同，今時今日的年輕人，出來社會做事之後，應該盡早為自己買一份危疾保險，原因是危疾保險始跟健康有密切關係，趁自己身體健康時買定，就沒有後顧之憂。
況且，最主流的危疾產品都有儲蓄成分，所謂買保險，也可以看成是儲蓄，即是等於將部分錢撥進另一個醫療儲備戶口，萬一有重病時，這筆錢可以發揮更大作用！如果一直健康，過一段日子之後，也可以取回自己儲起的錢！
另外，年輕的時候買危疾保險，保費也相對便宜。用我們行內的說法，槓桿效果會特別明顯。不過，這時阿東想起一個關於危疾賠償的問題，非常值得大家關注。
────────────────────
賠多次危疾保應運而生
「咦，森哥，我想問一下，我買了危疾保險之後，萬一真的患上危疾，賠償之後張單是否無效？換句話講，如果我醫番好之後，我還可不可以有危疾保障？」
「阿東，你的問題好好！我講俾你知，以前的危疾保險，的確係賠了一次就完，大部分情況下客人都好難再買危疾保險，買到都一定有附加條款，例如不保事項，又或者要加價。」
「咦，咁我就有點擔心了。我可以講俾你知，我有個表哥，依家30幾歲，5年前患鼻咽癌，但由於發現得早，現在已經醫番好，但係佢同我講，隨年紀大了，好驚自己再患另一次重病，所以，佢都想買番份危疾，但係就沒有保險公司受佢！」
「係啊，這類例子都好普遍！由於飲食或者污染問題，依家城市人患上危疾的發病年齡普遍都早了，即係我們講的重病年輕化；但另一方面，又由於醫學昌明，依家幾乎沒有甚麼病係可以叫得做絕症，因為大部分病都可以醫番好，爭在你有沒有錢去醫，所以，如果你的保障愈大，就愈有條件去醫病，又即係愈有條件醫番好了！於是，市場對於一些可以保幾次的危疾保險，逐漸就形成一種需求，結果，近一兩年就有幾間保險公司推出一些可以保幾次的危疾保險！」
「啊，咁到底係點樣保呢，森哥，說來聽聽啦！」阿東似乎比我更心急。
「根據我的了解，好多保險公司而家都可以俾客人揀，買只賠一次的危疾保險，又或者買可以賠多次的危疾保險。」未等我說完，阿東就急問︰「咁賠多次即係賠幾多次啊？」
────────────────────
賠償次數愈多保障愈大
「其實間間保險公司都不同，最普遍係賠5次，但有些就賠3次！」
「嘩，賠5次？即係中5次危疾？不要講笑啦，賠兩次就夠了！」芳姐本來站聽我們說話，但聽到我說賠5次之後，突然間很有興致地加入我們的話題。
「芳姐，我都不想賠這麼多次啊，但係患幾多次重病，自己根本沒有選擇，所以賠償次數愈多，其實保障愈大，會令自己安心點！」
「你講得沒錯，森哥，那麼繼續啦！」
────────────────────
羅國森
資深財經編輯，現任保險理財顧問，擁有認可財務策劃師資格，曾出版《讓你富起來》及《逆市淘金》等暢銷著作。
────────────────────
更多iMoney智富雜誌內容，請登入 http://www.imoneymag.com
沒有留言:
張貼留言